星期日, 七月 3, 2022
根據台灣通訊傳播委員會(NCC)統計,台灣5G用戶人數喺8月份已經達到363.9萬。 以流動網絡用戶總數計算,5G佔整體流動網絡用戶12.3%。 目前5G覆蓋率到9月底已經達到85%,下一個目標係接通公共交通樞紐嘅5G網絡。 之前台灣交通委員會就質疑,台灣各個網絡提供商嘅5G服務收費同質素唔成正比,導致消費者嘅投訴激增。希望 NCC 方面可以提供方案去提升5G覆蓋率並且強化偏遠鄉村地區嘅5G網絡服務。 台灣自從舊年6月正式推出5G網絡服務之後,截至今年8月5G用戶人數大約有363.9萬。而4G加5G流動網絡用戶統一計算,人數大概2959.4萬,5G只係佔整體用戶人數12.3%。 截至8月計算,全台灣大概有2萬幾座5G基站。預測去到9月底,5G覆蓋率已經可以達到85%。進度遠遠超出今年原本計劃嘅50%覆蓋率。 NCC 關於5G服務嘅報告裏面亦指出,今年1到9月對5G服務嘅投訴案件總共有508單。當中主要嘅投訴內容都係同5G網絡通信品質差有關,大約佔總投訴68%。 8月起投訴量有輕微下降,7月有83單投訴、8月同9月平均只有67單。 原因可能係因為疫情減緩之後,基站附載降低以及建設速度都開始逐漸加快,從而對網絡質素有所改善,投訴案例亦相對減少。
新加坡電信 (Singtel) 最近就透露咗點樣通過同愛立信合作去推動更多各行業去採用5G服務。 當中三間大企業已經運用 Singtel 嘅網絡功能同測試設備進行緊試驗。 三間公司分別係 ABB、Axis Communications 以及 Hexagon。 正在進行嘅試驗涵蓋先進製造、物流、智能城市發展同埋工業自動化。 新加坡電信發言人喺一份聯合聲明裏面表示,同愛立信嘅合作令到佢哋有機會共同建立一個開放平台,可以俾唔同嘅公司去共同創造、測試,希望測試嘅各項功能最終可以真正被公司採用。 ABB 測試咗利用新加坡電信嘅5G網絡去支持機器人喺工業製造環境裏面嘅低延時操作。 而...
台灣5G網絡推出超過一年,但係普及率同4G比仍然相差好遠。 不過近期5G新旗艦機 iPhone 13 以及三星Z摺機系列熱賣,有望帶動新一輪升級5G熱潮。 不過有台灣電信業高層認為,真正升級5G嘅熱潮,可能仲需要2年時間。 台灣5G網絡表現非常出色,遠傳5G下載速度平均更達到447.8Mbps,獲得 Opensignal 2021 上半年全球5G流動網路體驗調查世界第一名。力壓第2名嘅韓國 SK Telecom,顯示台灣5G網速超越英、美、韓國等等推出5G時間較早嘅國家。 雖然網速表現成為冠軍,但係台灣5G網絡普及率只有1成多啲,對比4G推出一年之後嘅大約27%普及率較低。 業界估計,到今年年尾台灣5G用戶比例大概可以上升到20%以上。 根據業界分析,台灣4G推出嘅時間較遲,當年轉換去4G技術嘅時候,技術、設備等各方面都已經比較成熟。
美國雖然放生孟晚舟,但係並唔代表放生華為。美國就華為問題持續向各國施壓。 巴西外交部長 Carlos França 喺出席聯合國大會期間同美國國務卿布林肯見面嘅時候重申,巴西唔會阻止華為參與5G拍賣,巴西唔會歧視任何國家嘅任何公司。 今次係拜登上任以嚟,兩國官員之間最高級別嘅會面。 根據巴西外交部透露,喺45分鐘嘅會談裏面,美國同巴西兩國外長就5G、移民、氣候以及雙邊關係等話題進行咗討論。 當提及到中國嘅時候,布林肯就話中美關係亦敵亦友。而講到有關5G拍賣呢個議題,巴西外交部長就明確表示巴西政府唔會歧視任何人。 巴西國家電訊管理局之前宣布,將會喺11月4號舉行5G拍賣。而佢哋亦冇禁止華為參與今次嘅拍賣。
意大利流動網絡提供商 TIM 最近被網絡評價網站 Opensignal 評為歐洲最快嘅5G流動網絡。 Opensignal 最新一份全球5G流動網絡體驗報告,將 TIM 選為歐洲5G流動網絡下載速度冠軍。 TIM 喺4G同5G網絡之間嘅下載以及上傳速度,影片以及遊戲用戶體驗方面嘅提升亦成功進佔全世界前30名。 呢個係統計由2021年1月1號至到6月29號收集所得嘅測量數據而得出嘅獨立分析結果。 研究分析咗全世界比較領先嘅網絡提供商旗下流動網絡用戶體驗,發現 TIM 用戶實測獲得 296.5 Mbps 嘅5G下載速度,比 4G下載速度快咗1000%有多。 除咗 TIM 成為歐洲最快5G網絡之外,報告亦指出,台灣遠傳電信係全球最快,用戶平均下載速度可以達到...
英國其中一間流動網絡提供商 EE 透露,準備10月份開始喺英國全國性推進新階段嘅5G網絡推出。 EE 表示,今次係佢哋之前承諾會提供高性能 5G 嘅其中一個項目。佢哋今次會針對會 5G 室內嘅表現作出改善,希望擁有最新 5G 手機嘅用戶可以明顯感受到 5G 網絡性能方面嘅進步。 為咗實現呢一點,EE 將會使用喺 3 月份由 Ofcom 拍賣中獲得嘅新...
中國工信部最新公佈,中國已經建成全球最大規模5G網絡。 中國已經建成5G基站99.3萬個,覆蓋全國所有地級市、95%以上縣區同35%鄉鎮。 而今年頭8個月中國5G手機出貨量1.68億部,同舊年同期相比增長咗80%。 根據8月份嘅統計數字,5G手機嘅市場佔有率已經上升到74%。5G設備連接數量佔全世界80%以上 。 今年上半年,中國移動5G用戶人數有2.51億,滲透率達到26.5%;中國電信5G用戶人數有1.31億,滲透率達到36.2%;而中國聯通5G用戶人數就係1.13億,滲透率有37%。 因應媒體、醫療、交通、教育等行業而衍生嘅咗大量應用程式,例如5G+4K/8K高清影片、5G+智能醫療、5G+車聯網、5G+遙距教學等等。 預計未來兩年內5G增強技術研發以及應用發展嘅步伐將會明顯加速。有望將5G嘅實際用途再進一步發揚光大。
英國政府啱啱公佈咗一個新計劃,就係將會俾流動網絡提供商更容易使用燈柱、巴士站或者其他街道設施,幫助加快5G網絡推出。 雖然5G網絡技術擁有高速同低延時嘅優點,但係佢嘅表現好容易被一啲難以穿透嘅物件所影響(例如牆壁、天花板以及其他任何可能阻擋無線電頻率嘅物件)。 所以5G網絡比前幾代流動網絡需要更多基站,而基站建設嘅速度亦都比較緩慢。 例如,英國電信曾經表示,公司正在努力希望去到2028年可以提供近乎全國覆蓋嘅5G服務,需要整整七年時間去實現呢個承諾。 依家佢哋只係成功覆蓋英國人口嘅40%。 政府今次推出呢個新方案有望可以幫助加快增加5G網絡覆蓋範圍,希望利用cctv燈柱、交通燈同其他路邊基礎設施去提高覆蓋率。 同獨立發射站相比,街道設施可以更便宜、更快速增加5G網絡覆蓋。不過之前各大網絡提供商都覺得好難獲得街道設施嘅資料,好難驗證一啲設施嘅結構係咪適合安裝5G網絡設備。 例如特定街道設施嘅位置、物理尺寸、同街道嘅接近程度又或者電源使用情況等等。
澳洲Vodafone啱啱宣佈,已經向5G覆蓋範圍內嘅用戶開放5G固網無線試驗。 希望試用嘅人可以選擇兩種計劃。 第一種係每個月75 澳元,無限數據,速度最高可以去到100Mbps。第二種就係冇速度上限,但係就要每月額外多10澳元。 而已經用緊Vodafone流動網絡服務嘅客戶可以每個月減5蚊。 Vodafone會為客人提供一個價值612澳元嘅5G室內固網modem。 Vodafone發言人話公司嘅4G家居無線寬頻服務需求巨大,今年上半年客戶數量加咗兩倍。 所以佢哋相信通過5G技術嘅優勢可以滿足到對高速網絡有需求嘅客戶。 澳洲Vodafone旗下TPG Telecom嘅5G流動網絡目前正在澳洲全國主要城市特定地區推出。 今個星期TPG亦公佈咗每個月85澳元嘅5G無限流動數據計劃。 喺最近發表嘅年度收益報告裏面,TPG Telecom總收入合共26億澳元。月費及非月費流動網絡用戶人數加埋就有510 萬名。
啱啱有分析公司發表咗一份最新研究報告,報告內容估計,到今年年底,5G智能電話嘅數量將會接近全球智能電話總數一半。 其中一個主要原因係,因為5G手機成本下降,價錢更平嘅5G手機款式自然越出越多。亦因為呢個原因,好多用戶都認為依家係一個合適嘅時候去投資落5G設備上面。 不過喺呢啲相對平價嘅5G智能電話當中,81%只係支持 “Sub6”,即係只涵蓋毫米波 (mmWave) 以下所有頻率。 預計到下年,支持 mmWave 嘅5G手機比例將會增長到32%。 統計資料亦顯示, 價值$91至$150美金嘅智能電話佔據咗全球智能電話市場當中最大比例。不過隨住升級5G手機呢個熱潮推動之下,智能電話平均售價都有上升。 除咗平價同中價手機,今年嘅高楷智能電話(平均售價超過751美金)出貨量預計將首次超過2億部。 之前喺另一份報告裏面亦都指出,5G網絡嘅基礎設施一路以嚟都以快速增加,雖然預計下年將會放緩。但係都表明咗電訊行業喺應對疫症大流行方面表現出色,基礎設施投資同消費者需求都冇受到太大影響。