星期日, 九月 26, 2021
據日本當地報導,目前 SoftBank 嘅5G網絡覆蓋仲係非常有限,對用戶嘅5G體驗有非常大嘅影響。 測試顯示,位於銀座嘅 SoftBank 門市,係 Softbank 5G網絡信號最好嘅地點,但係只要走到去另一條街之外嘅距離,5G信號已經完全消失。 SoftBank 5G網絡只係推出咗一個月,覆蓋範圍有限亦唔算太過分,不過一街之隔就收唔到5G信號,確實令人意外。 雖然目前 SoftBank 5G網絡覆蓋範圍有限,但係佢哋已經計劃緊擴大覆蓋範圍。 SoftBank 計劃今年年底擴大5G網絡喺東京同其他大城市嘅覆蓋範圍。但係如果要覆蓋90%嘅人群,預計要等到2023年先能夠達成。 當然,5G網絡覆蓋有限,並唔單只得 SoftBank 一間,日本其他電信營運商嘅5G服務亦存在類似嘅問題。 日本目前有3家電信營運商推出咗5G服務,另外兩間係...
根據官網消息,中國電信同中國聯通2020年5G 新建工程無線主設備聯合採購結果正式公佈。 華為、中興通訊、愛立信同大唐移動中標。中國電信同中國聯通今次採購規模一共大約有25萬座5G基站同其他5G無線主設備。今次招標採購結果冇公佈各個設備商具體佔幾多百分比,但據業內人士表示,華為、中興表現最好,兩者百分比或將會超8過成。 值得注意嘅係,喺今次中國電信同中國聯通嘅5G基站採購中,諾基亞冇入到圍。之前揭曉咗嘅中國移動5G二期無線網絡主設備採購,諾基亞亦都冇中標,華為、中興通訊、愛立信同中國信科(大唐移動)分別獲得57.2%、28.7%、11.5%同2.6%百分比,華為同中興兩家佔大概86%。 對於今次未能夠成功投標,諾基亞發佈聲明表示,諾基亞進駐中國市場接近40年,作為中國運營商嘅長期合作夥伴,諾基亞絕對尊重佢哋嘅決定,亦承諾大家嘅合作關係保持不變。 截至3月底,內地各省份已經建成嘅5G基站合共19.8萬個,5G用戶約有5000多萬人。 預計2020年新建50萬座5G基站嘅目標可以成功達成。
Twitter 開始將一啲煽動「有害活動」嘅言論刪除,特別係嗰啲話5G同疫情有關嘅陰謀論,同埋一啲呼籲大衆去摧毀5G設備嘅推文。 Twitter 發言人話佢哋擴大咗對未經證實消息嘅 監管,某一啲不實嘅資訊煽動群眾作出非法行為,可能導致重要嘅5G基建設施遭受到破壞或 損毀,或者構成大衆恐慌、社會動盪甚至大規模混亂。 Twitter 呢個行動係因為之前喺唔同社交網站上面嘅假消息,導致一啲歐洲國家嘅5G設施受到攻擊同破壞。所以佢哋需要更有效咁去遏制有關疫情嘅錯誤信息。 Twitter 會刪除一啲可能導致5G設施受到破壞或損壞,製造恐慌嘅未經證實消息。 呢啲消息包括「食物短缺」或者「5G電波會導致感染疫症」等等。 5G陰謀論之前廣泛流傳,令到英國政府要介入作出公開澄清否定呢個講法。
繼香港4月推出5G服務之後,台灣部份流動電訊供應商亦預計會喺暑假開始陸續推出5G網絡。 台灣其中一間主要嘅電訊供應商遠傳電信啱啱得到台灣通訊傳播委員會(NCC)嘅5G基站建設許可。預計年底前將設置2000多座5G基站。遠傳正在積極建立5G網路,希望可以喺暑假開始提供5G服務。 遠傳電信表示已經向Ericsson採購千幾座3.5GHz頻段嘅5G基站,預計今年底前將會設置超過2000座5G基站,目標5年內設置6000座基站。如果5G服務反應良好,將會加速設置基站為用戶提供提更完善嘅5G體驗。 今個月嘅15號,台灣另一間電訊商中華電信率先宣布得到NCC 5G基站嘅建設許可,係台灣第一間可以開始5G網絡建設嘅流動電訊供應商。 中華電信當時表示,第一批至少300座大型5G基站已經準備就緒,預計今年底前至少完成3000座基站建設,三年內建設超過一萬座5G基站。5G服務預計會喺今年第三季推出。 兩間電訊商嘅5G推出日期不謀而合,都係大概今年暑假期間。台灣嘅朋友唔使等好耐就可以感受一下5G網絡嘅威力。
本港三間電訊商包括香港電訊、3香港同中國移動香港都喺今個月頭正式推出咗5G服務。 除咗唔同嘅增值服務之外,當然唔少得5G電話上台plan。csl 今日就公佈咗5G服務連小米10或小米10 Pro 5G電話月費計劃。 csl 5G+小米10或小米10 Pro 5G 電話月費由$318起。並設有Trade-in月費回贈、附送每個月30GB額外本地流動數據,以及Club積分等優惠。 csl 5G+小米10/小米10 Pro 5G電話月費方案中分別有24 個月、36個月合約期,唔同月費計劃收費如下:
中國移動今日公佈,今年4月開始正式啟動嘅「5G上珠峰」專題項目獲得咗實質性嘅進展。 截至4月19號,中國移動已經完成5300米珠峰大本營、5800米過渡營地嘅3個5G基站開通工作。 預計4月25號之前完成6500米前進營地2個5G基站以及開通所有相關地點建設。到時中國移動5G信號將會成功覆蓋到珠穆朗瑪峰峰頂。 據了解,中國移動「5G上珠峰」活動計劃喺海拔5300米珠峰大本營、5800米過渡營地、6500米前進營地,建設5個5G基站。 同時對珠峰保障區周邊嘅177公里傳輸幹線同沿線機房進行升級改造同維護加固,打通拉薩至成都核心網,喺海拔5300米、5800米、6500米海拔高寒區域新增鋪設光纜25公里。 為保障今次行動能夠順利完成,中國移動總共派出150多名員工負責建設同維修保養。 需要運送上山嘅網絡建設設備同生活保障物資達到8噸之多。 同步使用華為設備建成並開通咗3個4G基站同5座5G基站。 12名網絡維護管理人員全天候7*24駐守喺海拔5300米以上嘅區域,保障珠峰區域網絡暢通、性能良好。 今次確實係一個好龐大嘅工程,除咗可以顯示到中國移動嘅實力。 相信對未來攀登珠穆朗瑪峰嘅人士亦都會有非常實在嘅幫助。
受限於波蘭政府為咗阻止疫情擴散而強制執行嘅新規例之下,監管機構暫停咗國內首次5G頻譜拍賣嘅投標截止日期。 波蘭電子通信辦公室喺一份聲明中表示,因應政府3月31日採取嘅措施而作出呢個相關嘅決定。 但係電訊商 Orange Polska 就話對於呢個決定感到非常「驚訝」。 因為根據監管機構之前所有嘅跡像都表明拍賣會如期進行。 喺政府實施相關條例之前,監管機構喺一份聲明度表示,雖然3月初喺國內證實首個確診病例,但係投標嘅截止日期仍然係4月23號,冇任何改變。 暫時監管機構仲未有公佈新嘅時間表。 電訊公司將會競投3.6GHz頻段中嘅四個頻譜(3480MHz至3800MHz),起價為1.083億美金。 由於疫情嘅影響,包括西班牙、德國、美國同中國等其他幾個國家,5G網絡嘅發展都受到一定阻延。 連5G頻譜都要延遲拍賣,相信波蘭推出5G嘅日期將會大大落後其他已經積極發展緊5G網絡嘅國家。
香港啱啱喺4月份正式進入5G時代。5G除咗速度比4G快之外,另一個賣點係低延時,甚至「零延時」。 而就住近期受疫情嘅影響,好多人都擔心去醫院或者診所會增加感染風險。所以就有公司襯機推出視像醫療呢項服務。 以前嘅視像對話其實普遍都係會有窒滯,唔係太流暢,未能夠做到「實時」嘅感覺。但隨住5網絡嘅推出,理論上視像對話嘅體驗應該會有大幅改善,真正做到零延時,同面對面對話分別唔大。 視像醫療服務大致嘅流程係:醫生透過視像進行問診服務,並對用戶進行初步診斷。 如果被認為係高風險嘅病人,醫生會透過速遞公司將收集唾液樣本嘅容器送到用戶屋企,用戶根據指示自行收集唾液樣本。最後,再由速遞去回收唾液樣本,並送去衛生署轄下指定化驗所進行化驗。 全程病人唔需要離開自己屋企同其他人接觸。如果真係確診,亦可以減低傳染其他人嘅風險。 其實喺武漢「封城」期間,醫護人員人手緊張,全國唔同地方嘅醫生同專家亦都利用5G同武漢醫生進行兩地會診,為病人提供治療方案。據統計,目前內地喺2019年已經有1.2萬個遠程會診案例。利用5G遠程醫療做嘅手術,到目前為止都係成功嘅。 香港地方唔算大,睇醫生本來係一件好方便簡單嘅事。但由於疫情嘅關係,亦大大改變咗好多人嘅習慣。可以盡量少接觸到其他人嘅大前提之下,視像醫療確係一個非常好嘅做法。配合5G網絡推出,正正係推廣呢個服務嘅大好時機。
繼英國之後,喺上星期荷蘭亦相繼有幾座5G信號塔被人縱火同蓄意破壞。普遍認為呢幾單破壞嘅「幕後黑手」係反對5G網絡嘅激進抗議者。 過去一星期內,荷蘭已經發生咗4單類似嘅事件,最新一單就發生喺星期五(10號),北部城市格羅寧根嘅5G信號塔遭到縱火。而據荷蘭新聞網站報導,至少有 6座信號塔被縱火破壞。 雖然經過多次情澄清,但係網上仍然有好多針對5G嘅激進言論流傳。有網民認為需要破壞更多信號塔。仲呼籲其他人要對任何5G相關設施加以破壞、燒毀。 同歐洲某啲國家一樣,荷蘭反對5G人士認為5G天線會釋放輻射,從而引發疾病。 荷蘭負責監督安裝信號塔嘅組織「莫奈基金會」(Monet Foundation)主管羅布·邦格拉爾認為,反對推出5G技術嘅激進抗議者係一連串攻擊嘅幕後策劃者。 其實呢幾個星期已經有好多專家/ 組織/ 政府部門多次鄭重否定左網上關於5G同散播病毒有關嘅假消息。希望大家理智啲,唔好再破壞相關嘅5G設施。專注返喺一啲正確嘅抗疫措施上面。
據外媒報導,近期網絡上嘅陰謀論試圖將疫症同5G技術扯上關係。雖然呢個講法冇任何科學根據,之前亦已經澄清咗。不過英國呢幾日仍然有多座5G基站被焚燒。 呢啲陰謀論喺 Facebook、Instagram 呢類社交平台上面極速散播。而美國聯邦緊急事務管理局(FEMA)同聯邦通信委員會(FCC)都非常明確咁指出:「5G技術唔會造成病毒擴散。」 一啲未有5G網絡嘅國家亦一樣有爆發疫情,而5G網絡嘅電磁波並唔會對人體造成傷害。今次嘅疫情係由一種同電磁波完全無關嘅傳染性病毒引起。總括嚟講,5G同疫情唯一有嘅關聯就係噤啱兩樣都係差唔多時間發生。 之前流傳嘅陰謀論認為,病毒可以通過5G網絡傳播,或者5G網絡影響咗人體免疫系統。呢兩種講法都不符合事實。如果想要理解為什麼5G同病毒冇關,咁就要了解點解5G電磁波嘅功率唔足以損害人體細胞、傳播病毒。同之前嘅4G或3G網絡類似,5G網絡中使用嘅電磁波係低頻非電離輻射。同X光、伽馬射線、紫外線等等嘅電離輻射唔同。 5G嘅電磁波並唔足以加熱人體細胞,削弱免疫系統。細胞微生物學副教授 Simon Clarke 喺近期接受BBC訪問嘅時候表示:「認為5G網絡會影響免疫系統嘅念法係毫無根據。」 另一方面,疫情亦都襲擊咗伊朗、印度等仲未開始建設5G網絡嘅國家。據報導,伊朗啱啱確定咗大概喺今年下半年先會推出5G技術。伊朗目前有超過6.6萬個確診病例。而印度嘅5G網絡建設可能因為疫情而推遲。另外韓國已經建設5G網絡一年時間,但韓國並唔係最先爆發疫情嘅國家。 監管機構、科學家同獨立團體都已經澄清咗大衆對5G網絡嘅擔憂。英國監管機構記錄嘅5G電磁輻射水平遠低於國際標準。國際非電離輻射防護委員會(ICNIRP)亦都冇發現任何證據表明5G網絡對人體健康構成危險。