星期日, 九月 26, 2021
內地三大電訊營運商中國移動、中國電信、中國聯通尋日聯合11家合作夥伴,共同發佈咗《5G短信白皮書》,提出咗對5G短信嘅展望。 5G短信,即係RCS信息,作為傳統SMS嘅全新升級,可以利用短信就做到一啲之前需要下載APP先做到嘅嘢。 分析指出,2G時代興起嘅短信隨住5G時代嘅來臨將會全面升級。傳統短信唔單止唔會消失,喺沉寂多年之後,好有可能喺RCS信息嘅帶領下再度興起。更有專家預測,RCS一旦全面推廣,未來或者會取代大部分使用率唔高嘅APP。 白皮書指出,當5G時代來臨嘅時候,全球嘅營運商已經達成共識:傳統短信業務需要升級到多媒體短信業務,亦即係5G短信。5G短信唔單止支持個人用戶之間嘅多媒體消息互通,亦令到商業客戶可以對佢哋嘅用戶提供擁有豐富多媒體內容嘅新型SMS互動服務。 喺2G時代,SMS 使用率極高。到咗3G時代,SMS慢慢開始沒落,4G時代SMS已經變咗做用嚟收取唔同APP嘅短信驗證碼同垃圾信息嘅工具。喺4G時代,微信、WhatsApp 等即時通訊APP已經完全取代咗短信嘅功能。而到咗5G時代,短信嘅用途又開始發生變化。 5G短信嘅發展擁有無限嘅可能性,除咗基本短信功能,仲可以做到聊天客服、在線購物、短視頻營銷等等。 5G短信 (RCS信息) 融合咗語音、信息、狀態列、位置服務等等。通過手機上嘅RCS,唔單只係發送文字、圖片或影片,仲可以有互動功能。RCS 加強咗互動嘅能力,可以做到訂票、訂酒店、導航等一系列複雜嘅工作。傳統APP需要下載,佔用手機儲存空間,RCS息信就可以直接通過息信就做到依家一啲只可以用APP先做到嘅嘢。
4月1號推出5G服務之後。各個電訊商都推出唔同嘅優惠去吸引客戶上台。 近期疫情影響之下,學生們唔需要返學,打工仔亦好多留喺屋企工作。打機成為其中一個最好嘅娛樂,遊戲機同遊戲碟銷量都有所增長。csl啱啱就推出全新5G服務優惠「PlayStation 4主機優惠服務計劃」。 由星期五(4月10日)起,只要選用csl推出嘅 PlayStation 4 主機優惠服務計劃「PS4 Pro 2TB 遊戲組合」或「 PS4 MEGA PACK 遊戲組合」,就可以零機價獲得PlayStation 4主機。指定大專院校學生更可以免預繳出機。
中國移動已經全面完成5G第一期工程建設,喺內地50個城市推出咗5G服務。 目前更加已經全面啟動咗5G二期工程設備測試同採購等工作。希望去到2020年底5G基站數目可以達到30萬個,確保2020年可以成功為全國所有地級以上城市提供5G網絡服務。 即係話中國移動2020年內仲需要建成25萬座5G基站。為咗達到呢個目標,中國移動2020年嘅開支預算係1798億人民幣,其中5G相關投資計劃約1000億。 中國移動近日亦公佈咗2020年5G二期無線網絡主要設備嘅採購結果,總共需要 232143 座5G基站,採購總額係 370.88億。根據呢個數字計算,單單一座5G基站價格就要16萬。 今次嘅採購名單包括華為、中興、愛立信同中國信科(大唐),採購價格大概係13.5萬至16.12萬之間。 其中,華為中標 133040 座5G基站,中標比例係57.25%,佔半數有多。佢哋嘅5G基站單價亦係四間供應商裏面最高嘅,達到16.12萬一座。 另外要留意嘅係,5G係一個龐大而復雜嘅系統,除了基站本身之外,仲需要有其他設施配合,例如:核心網絡傳輸設備、電力配套設備等等。如果計算哂所有設施嘅價錢,平均一個5G基站嘅成本其實會更加貴。 所以中國移動投資5G相關嗰1000億,可能實際上並唔算天文數字,或者只係啱啱夠用。
SoftBank 同 KDDI 兩間公司喺一份聯合新聞稿中宣佈,佢哋一齊成立咗一間合資公司去促進 5G 喺日本農村地區嘅發展。 兩間公司早於2019年7月宣佈達成協議成立合資公司 5G JAPAN Corporation(5G JAPAN)。 5G JAPAN 將會互相分享 SoftBank 同 KDDI 各自擁有嘅基站去加快 5G 網絡喺日本農村嘅發展。 雙方表示,呢間合資公司仲會為 5G 基站進行建築設計同施工管理工作。 舊年兩間電信營運商開始研究相互合作可以點樣去幫助降低成本並縮短北海道旭川,千葉縣成田市同廣島縣福山市...
隨住5G服務正式喺香港推出,一啲5G獨有嘅增值服務亦都陸續推出。 例如串流音樂平台MOOV,佢哋啱啱就推出咗24 bit無損串流,成為全港第一個提供24 bit錄音室原音母帶串流音樂嘅平台,帶嚟更高音質嘅享受。依家1O1O同csl 5G客戶可以優先試用呢項服務至6月30號,月費最低$78起。 MOOV本身已經提供16 bit CD音質串流音樂,依家配合5G服務更推出24 bit音樂串流,包括24 bit / 192kHz嘅FLAC無損音樂、24 bit / 96kHz錄音室原音母帶音樂同24 bit / 96kHz嘅升頻版本音樂。MOOV亦係目前香港最大嘅24 bit FLAC音樂庫。一首24 bit歌曲大約需要50至200MB左右。 目前MOOV約有超過2萬首24 bit音樂,主要以廣東歌為主,除咗最新最Hit嘅歌曲之外,亦都有大量經典金曲。當然,唔同嘅電話同耳機對音質亦會有一定影響。例如部份電話內置DAC解碼,音質自然會比較優勝。
今日起香港三個網絡供應商都同日推出5G服務。 中移動香港就喺今日凌晨零時零分啟動佢哋嘅5G服務。 而 csl 今日亦宣布推出5G迎新限定優惠。於4月1日至7日,新上台或續約客戶選購指定csl 5G服務計劃或1O1O 5G尊尚服務,都可以於承諾期內每月額外獲贈30GB本地流動數據。 4月1日前已經選購咗5G服務計劃嘅客戶,都可以得到呢個優惠。 另外由4月1日起,新上台或續約客戶選購Samsung Galaxy S20、S20+、S20 Ultra,以及登記指定csl 5G服務計劃或1O1O 5G尊尚服務,可以享受額外雙重優惠。 1.除可以享有Now E「英超西甲」2020/21 4K賽季通行證(價值:1,680元)之外, 2.更可以享有免費6個月MOOV 24 bit音樂服務(價值:660元),或免費6個月csl 5G VR應用程式(價值:468元)。
四月一號開始,香港正式進入 5G 時代。之前已經有三間網絡商公佈咗 5G 服務月費。 而中國移動香港(CMHK)今日(31日)就舉行網上發佈會,正式宣佈將會喺4月1號零時零分正式啟動 5G 網絡服務。 CMHK 早前公佈旗下嘅 5G 月費計劃,最平月費只需要港幣$198就可以登記「5G體驗服務計劃」,而今日發佈會上亦進一步宣佈更多細節。 CMHK 表示佢哋 5G 網絡優勢有 3 個:佢哋係本港目前擁有最多 5G 網絡頻譜本地流動網絡營運商之一 (共 520 MHz);擁有連續最寬嘅 3.3GHz-3.5GHz...
一路以嚟5G嘅用途俾咗好多幻想空間大家。 最近西班牙流動電訊商 Telefónica 同巴塞隆拿交通局(TMB)聯同媒體公司合作打造咗一個融合 5G AR 嘅觀光巴士體驗。 當巴士路經唔同景點嘅時候,乘客就可以喺巴士車頭大玻璃窗見到唔同嘅相關內容。 呢個 5G AR 巴士遊係 "5GBarcelona" 計劃嘅一部份。5G 網絡可以做到實時下載路經地方嘅相關內容,然後將內容顯示喺位於巴士車頭玻璃窗嘅透明互動式屏幕上面。 例如,途中巴士會經過一個歷史悠久嘅噴泉,但係個噴泉依家正在修復當中唔會有水噴出嚟。但係透過屏幕睇出去嘅時候,會用虛擬配合實景令乘客睇到個噴泉係噴緊水嘅。 另外當架巴士穿梭城市唔同大街小巷嘅時候,屏幕上仲會顯示有關建築物同古蹟嘅歷史資料。
暫時公佈咗嘅5G月費計劃,由8GB到300GB都有。價錢當然係其中一個重要因素,但係選擇幾多GB先會夠用呢? 使用5G服務喺數據用量上係咪一定會多過4G呢? 事實上由於5G網絡速度大幅提升,用戶可以喺電話收睇更多高清內容同音樂,加上打機亦可以用更快更低延時同朋友對戰等等。 用戶使用嘅數據量一定會上升,至於係咪真係需要到100GB,就視乎個人需要。 事實上,上個月有海外研究機構發表咗一份研究報告。研究以全球第一個推出5G商用服務嘅南韓作為研究對象。南韓前年底開始推出5G服務之後,直到舊年年底用戶達到470萬人,佔全國流動電話用戶7%。而呢批5G流動數據先頭部隊嘅使用量,亦都比4G用戶高出約3倍。 南韓嘅5G用戶平均每月使用27GB數據,而4G用戶則為9.8GB。如果只係計算使用無限上網用戶嘅話,5G用戶嘅使用量更高達33GB,高過4G無限上網用戶嘅25GB。 5G嘅推出除咗提供更快速嘅網絡傳輸,仲有負責「分流」呢個關鍵角色。分流啲乜嘢? 因為目前嘅流動通訊網絡,喺各式各樣設備都可以上網嘅情況下,已經差唔多負荷唔到。 5G嘅推出可以分擔咗一部份4G網絡嘅負擔,網絡擠塞嘅情況亦都會大為改善。 而南韓嘅經驗亦都話咗俾大家知,呢批5G先鋒雖然只佔總用戶7%,但係佢哋產生嘅互聯網流量卻佔整體用戶嘅兩成。亦都令4G流量嘅佔比由超過九成,在短短一年內跌到七成七。 根據各個電訊公司公佈,5G推出之後配搭嘅增值服務,都係以超高清影音、VR、AR 等等做賣點,而呢啲服務都需要使用大量數據。 究竟100GB係多定係少?真係要等多幾日5G服務正式推出先會知。
香港 5G 服務將會喺 4 月 1 號起正式推出。 四間擁有 5G 網絡牌照嘅電訊公司裏面,有三間已經發表咗佢哋嘅 5G 月費計劃詳情。 而 SmarTone 今日就宣佈推出三星 Galaxy S20 系列上台計劃,當中就包含咗 5G 升級優惠。當 SmarTone 5G 服務計劃正式落實之後就可以享有升級保證。