星期日, 九月 26, 2021
諾基亞5G業務競爭失利,希望藉著更換 CEO 可以挽回頹勢。 公司星期一宣布,已經任識六年嘅 CEO Rajeev Suri 將會喺8月離任。現任芬蘭能源公司 Fortum 總裁兼 CEO Pekka Lundmark 將會接任諾基亞 CEO 一識。 諾基亞係全球三大電信設備供應商之一,多年嚟一直同華為,愛立信喺電信設備市場上激烈競爭。 雖然華為最近喺美國、歐洲同澳大利亞遇到唔少問題,但諾基亞一直都冇辦法充分利用呢個機會,仍然喺為世界各地5G網絡營運商提供設備方面落後於其他競爭對手。 截至上一個月,華為表示已經得到至少91份商業5G合約,而愛立信同諾基亞分別得到81份同68份合約。
一路以來5G其中一個對手遊迷嚟講好重要嘅好處,就係延遲低,玩線上遊戲或者雲端遊戲會比4G更順暢。 究竟5G推出之後係咪可以完全解決雲端遊戲延遲嘅問題仲係衆說紛紜。某大跨國手遊公司負責人就認為未必有想像中噤理想。 可以解決延遲問題嘅原理其實好簡單,5G發射站同手提電話互相交換數據嘅速度快咗。數據傳輸量亦增大咗好多,所以就算同一時間有好多人連線都唔會拖慢速度。 但係有一點唔可以忽略,就係光纖速度。5G暫時未有解決海底光纜嘅問題,跨境嘅流量仍然要經海底光纜,而海底光纜仲存在延遲嘅問題。 所有光纜每走一段就需要用到一個放大器,每經過一個放大器就有幾毫秒嘅延遲,如果光纜路徑比較長,就冇辦法控制延遲。譬如跨越中美就必定有超過10毫秒甚至30毫秒以上嘅延遲。再加上各種設備、環境影響,例如屋企裏面隔咗兩間房,信號唔夠強嘅話,都係會影響到接收。 就現有嘅頻寬同穩定程度嚟講,至少需要5 -10年時間解決問題,先可以真正做到「零延遲」。
財經事務及庫務局局長邱騰華較早前表示,本港5G發展將如期進行,四間主要流動電訊商將會喺第二季推出5G服務。 商務及經濟發展局常任秘書長(通訊及創意產業)梁卓文指出,近期有同各個電訊營辦商進行溝通,佢哋都表示近期社會事件同肺炎疫情對5G佈網工作影響唔大,喺商場、會展及機場等地方嘅佈網工作已接近完成。 服務一開始會喺人流及使用率較多嘅地方進行5G覆蓋,之後將會逐步擴展至全香港。 政府亦會多管齊下推動5G網絡發展同應用,包括資助電訊營辦商擴大光纖網絡至偏遠鄉村。政府亦會開放更多合適嘅政府物業、有蓋巴士站同電話亭等,俾電訊商安裝基站,支援5G網絡建設。 梁卓文又指,今年係對5G發展非常有利嘅一年,除咗較高價嘅旗艦手機之外,年中亦會有好多中價同入門級5G手機推出,有助推動5G需求。
有報告顯示,截至2020年1月,商業5G網絡已經喺34個國家嘅378個城市推出咗。 隨住5G服務競爭開始進入白熱化階段,好多網絡供應商都想搶佔一啲人口密集嘅大城市。例如洛杉磯同紐約就有多達5個提供5G服務嘅網絡供應商。 擁有最多已經推出5G嘅城市嘅國家係韓國(85個),其次係中國(57個),美國(50個)同英國(31個城市)。 喺地區覆蓋方面,歐洲、中東同非洲領先,有168個城市已經推出咗5G服務。亞洲排第二,有156個城市。而美洲就排第三,一共有54個城有5G覆蓋。 上述所提到嘅5G服務係包括移動同固定無線5G網絡。 照而家嘅趨勢,一衆電訊供應商除咗希望快人一步推出5G服務之外,亦開始將競爭嘅重點轉向「最優質5G網絡」呢方面。 當遲啲每一個供應商都成功推出5G服務之後,客戶選擇電訊供應商嘅首要條件當然係5G網絡嘅質素,例如速度、覆蓋率同其他增值服務。 當然價錢亦都會係一個好重要嘅考慮因素。希望香港各電訊網絡供應商可以盡快公佈嚟緊5G服務嘅收費詳情。
由於 MWC 取消嘅關係。高通發佈會就改為喺自己家鄉聖地亞哥舉行。 喺呢個 "What's Next In 5G" 嘅發表會度,高通重點介紹咗最新嘅第三代5G modem X60,據稱呢款最新modem具有超快下載同上傳速度。可以達到超過7.5 Gbps嘅下載速度同3 Gbps嘅上載速度。 高通亦宣布將會喺本季同「合作夥伴」一齊測試X60。 2020年對於iPhone嚟講係好重要嘅一年。傳聞外形方面會接近之前iPhone 4嘅經典設計,亦係Apple 第一部5G電話。咁會唔會iPhone 12 就係用呢粒高通X60嘅第一部機? 之前已經有報導話iPhone 12會使用市面上最新嘅5G...
根據預測,到咗2030年,全球將花費7000億至9000億美金喺安裝5G設備上面,並覆蓋全球人口25%,約20億人。 新嘅5G網絡將令到下載速度比現有嘅4G網絡快10倍,並且可以將連接到基站嘅設備數量增加100倍。亦會造做一啲可以改善醫療保健、製造業同其他行業嘅新應用程式推出。 喺美國,AT&T、Verizon同T-Mobile啱啱開始喺某啲城市推出5G網絡。覆蓋範圍暫時好有限,仲需要幾年時間先可以達到現有4G網絡覆蓋範圍嘅水平。最近一項測試發現,就算安裝咗最快5G技術嘅地區,5G下載速度都會有好大差異。相比美國,韓國同中國有更多城市已經推出咗5G網絡。 如果使用同現有4G網絡相同頻譜嘅5G,雖然速度會慢啲,但價錢就會平啲。到2030年就可以用4,000億至5,000億美金成本覆蓋全球80%人口。雖然速度只係比現有嘅4G網絡快小小,但由於連接設備嘅容量更大同傳送數據嘅延遲更短,所以就算唔係最快嘅5G網絡,仍然有助促進大量全新應用程式推出。 雖然唔係最高質嘅5G網絡,但係經濟學家仍然希望通過中低速嘅5G網絡可以喺2030年為全球嘅GDP帶嚟1.2萬億至2萬億美金增長。
香港電訊宣布將喺4月推出5G服務,目標成為香港第一個推出5G嘅電訊商。 香港電訊擁有全港最多5G頻譜。公司發言人仲話5G服務同4G嘅分別,唔單止係價格同數據用量,佢哋亦都會為消費者推出5G專享嘅應用程式同娛樂節目。 香港電訊會同Now TV、MOOV合作,提供精彩嘅視聽娛樂體驗。由於5G可以做到超低延遲傳輸,會夥拍Now TV獨家播放歐洲國家盃2020,可以提供虛擬實境、360度多鏡頭及高清畫質播放,令觀眾有親臨其境嘅全新體驗。 而MOOV嘅音樂亦可以透過24 bit音質播放。電競亦都係香港電訊5G其中一個重點,公司會將5G結合雲端遊戲同超低延遲傳輸等優勢,希望可以為「die hard gamers」提供不一樣的打機體驗。 雖然仲未有確實嘅推出日期同收費詳情。但預計香港電訊3月就會公佈更多有關5G服務嘅詳細資料。大家拭目以待。
早前有報告指出,中國喺全球5G發展中處於領先地位。預計到2025年,中國將擁有4.6億5G用戶,將會成為全球最大5G市場。 中國喺3G同4G時代相對落後於其他國家,5G時代嘅領導地位自然成為中國十分重視嘅「首要任務」。 2020年,5G陸續會喺唔同國家普及。報告指,今年年底將有18個國家及地區嘅電訊商推出5G網絡。唔少國家都全力開發同部署5G,希望可以成為引領世界5G發展嘅「領導者」。 報告以4G發展為例,美國喺4G發展嘅領導地位,令到GDP增長咗1,000億美金,而無綫網絡相關工作則增長84%。4G嘅成功亦推動咗好多創新嘅行業同平台,例如 Uber、Instagram 或 WhatsApp 等等。 高通(Qualcomm)總裁 Cristiano Amon 認為,唔少國家一早已經意識到5G嘅重要性。5G有望比4G產生更大嘅經濟同社會影響。喺未來15年內,5G技術有望為全球經濟貢獻2.2萬億美金。 目前,中國係世界上最大嘅移動通訊市場,並有望喺2025年成為最大嘅5G市場。到時,中國3大5G服務運營商「中國移動」、「中國電信」同「中國聯通」將涵蓋65%中國人口,而5G連接將佔中國移動通訊29%。