星期五, 三月 5, 2021
愛立信被台灣遠傳電信選為5G獨立及非獨立雙模5G核心以及LTE語音服務供應商。 愛立信目前喺40個國家/ 地區擁有79個實時5G網絡,並且成功同131個網絡提供商簽署5G商業合約。 愛立信將會繼續投資,務求加大產品全球覆蓋範圍。鑑於東北亞,北美同歐洲加快5G部署,當中唔少國家選擇愛立信為合作公司,公司亦因此獲益不少。 今次係遠傳電信同愛立信喺5G流動網絡上面再進一步嘅合作。之前遠傳喺2020年7月首次推出5G服務亦係由愛立信負責。 嚟緊愛立信會幫助遠傳擴展5G非獨立功能以及喺唔同頻譜上嘅獨立發展。 當中包括用於網絡擴展及轉換嘅規劃同設計服務。 合作仲涵蓋咗愛立信無線電系統產品,令遠傳可以喺唔需要付出龐大費之下順利由4G過渡到5G。 而愛立信嘅人工智能優化技術亦將會首次喺台灣使用。 呢項技術可以確保對5G網絡性能進行持續優化,並確保用戶可以得到更好嘅網絡使用體驗。
1月底中國發佈消息指出,中國喺2021年計劃新建5G基站60萬個。 隨住5G基站不斷增加,嚟緊兩至三年5G手機嘅換機潮相信會一浪比一浪強勁。 2020年中國5G電話銷量開始急速上升,各電話製造商都接到為數唔細嘅訂單。 不過由於疫情影響令到生產量未能追上。 廠商們唔單止訂單交貨期要大幅延長,製成品嘅存貨量都達到咗近幾年嚟最低嘅水平。 有數據顯示,2021年1月中國手機市場總出貨量有4012萬部,比舊年同期增加 92.8%。 5G手機方面,2021年1月中國市場出貨量有2727.8萬部,佔同期手機出貨量 68%。 舊年1月份5G手機佔嘅比例只係 26.3%。 隨住5G手機需求量激增,唔少型號都處於供不應求嘅狀態。 雖然購買5G手機嘅人數大增,但係預期當中嘅廉價千元價位5G手機仲未推出市場。 影響5G手機價格下調嘅原因,主要都係關乎屏幕成本同晶片成本。
由於受到美國努力遊說,某啲歐洲國家都拒絕華為參與5G網絡建設。 不過中東國家就冇受到美國影響,同華為保持住緊密合作關係。 中東國家對科技項目越來越重視,目前正大力投資電訊產業。 英國同瑞典已經禁止國內5G網路採用華為設備,法國亦對華為設備加設限制。 但係包括沙地阿拉伯同阿拉伯聯合酋長國等波斯灣國家唔單止選擇華為合作建設5G網路,喺發展智慧城市方面,亦都同華為合作無間。 國際戰略研究所(International Institute for Strategic Studies)中東事務研究專員表示,波斯灣國家對於利用科技監察人民嘅理念同中國比較接近,同西方國家唔一樣。 所以歐美發出關於華為嘅安全疑慮,說服力對於中東地區嚟講唔算大。 除咗中東國家,巴西國家電信局亦都批准咗今年5G網絡頻譜拍賣嘅規則,當中冇對作為設備供應商嘅華為作出任何限制。
全球流動通信系統協會(GSMA)喺2021年世界流動通信大會期間發表《2021中國流動經濟發展報告》。 報告當中指出2020年中國5G用戶數量超過2億,佔全球5G用戶總數87%。 去到2025年,中國5G用戶人數有機會達到8.22億。 而網絡提供商喺2020年至2025年嘅投資總額將會達到2100億美金,其中90%係用喺5G建設同發展。 至於獨立5G網絡亦都開始陸續推出。截至2021年1月,全球57個國家已經有144個5G流動網絡推出咗。5G用戶人數達到2.35億左右。 而中國5G嘅迅速發展亦代表住4G網絡已經達到飽和。2020年中國4G滲透率第一次出現下滑,隨住越嚟越多人選用日漸普及嘅5G服務,嚟緊幾年4G用戶人數相信會持續下降。 到2025年,4G將會佔中國總流動網絡用戶人數53%,而5G就佔47%。 報告顯示,到2020年尾為止,中國有12.2億流動通訊用戶,佔全國人口83%。 相比全球喺 66%,中國已經成為全世界最發達嘅流動通訊市場。 目前中國已經有超過9.9億人使用流動互聯網服務,預計到2025年,將會有接近12億人使用流動互聯網服務。
Vodafone 成為紐西蘭第一間推出5G無線固網嘅網絡提供商。月費由69美金起,而無限用量計劃就要每月79美金。 無線固網又或稱無線寬頻,所指嘅就係使用流動無線網絡將高速寬頻傳送到固定位置,例如屋企或辦公室。 適合一啲冇光纖覆蓋,又或唔能夠鋪設光纖線路嘅地方。 5G無線固網需要使用一個特定嘅路由器,但係同光纖唔一樣。佢唔需要駁線,唔需要機樓配合,唔需要上門安裝。只要幾分鐘嘅 DIY 設置就可以使用。 其實無線寬頻喺紐西蘭已經存在咗好多年,Vodafone, Spark 同 2degrees 三大網絡提供商都有呢項服務,不過之前都係經4G提供網絡。 而事實證明無線寬頻都幾受歡迎,目前有大約20萬家用戶。 Vodafone 相信5G無線寬頻推出之後,用戶人數將會進一步上升。因為5G網絡可以提供同光纖相同,甚至更快嘅網速。 年幾前 Vodafone 率先喺奧克蘭、威靈頓、基督城同皇后鎮幾個地方推出流動5G網絡。 今次推出5G無線寬頻亦都係呢幾個地區。
根據媒體報導,馬來西亞總理穆希丁指出,2021年年底,馬來西亞民眾可以分階段使用5G網絡服務。 而馬來西亞將會成為區內第一個率先建立5G流動網絡,並提供即時(real time)網絡同公共服務嘅國家。 穆希丁喺主持「國家數碼經濟大藍圖」致詞時表示,5G唔單止可以提供更快嘅網絡,更重要係可以俾用戶配合唔同嘅應用程式去令日常生活更方便。 例如監察慢性病患者嘅病情、協助緊急情況同為獨居老人專門設計嘅應用程式等等。 截止到2020年,全球有100多個5G流動網絡投入服務。阿聯酋營運商Etisalat係最早採用5G技術嘅公司,佢哋喺2018年9月啟動咗5G系統,不過就只係以固定無線模式運行。 2020年底,全球一共有155個5G流動網絡,而一年前只係得53個。 預計2021年,全球將會有幾十間流動網絡提供陸續推出5G網絡服務。
根據最新數據顯示,iPhone 12 Pro Max,12 Pro 同 12 已經成為美國三款最好賣嘅5G手提電話。 iPhone 12 系列只係推出咗大概4個月就有呢個成績,証明咗 iPhone 喺美國仍然係主流。相信佢喺推動5G普及方面將會扮演一個重要角色。 報告係綜合咗銷量數據同埋由 Ookla Speedtest 用戶收集到嘅資料所得出。當中包含咗5G手機喺美國嘅累積銷量。 不過收集到嘅數據只係包括截至1月23號嗰個星期嘅銷售量。裏面係唔包括當時仲未開始出貨嘅三星 Galaxy S21 系列手機。 三星由2019年開始推出...
中國移動香港董事兼 CEO 李思恩表示,香港政府希望喺三至四年內解決5G限制問題。 喺適合5G服務嘅唔同頻帶當中,3.5 GHz頻帶以高數據速率提供廣泛覆蓋範圍,被認為係最佳嘅5G頻帶。 但位於大埔同赤柱嘅衛星站目前都正在使用3.5 GHz頻帶。 為咗避免干擾,通信管理局喺呢兩個地區設置咗限制區,限制興建同樣都係使用3.5 GHz 嘅5G基站。 政府就呢個問題,亦都同兩間衛星營運商進行緊商討,希望可以就將位於大埔嘅遙測、追踪及控制站搬去中坎角呢件事早日達成協議。 舊年中國移動香港推出咗香港第一個5G獨立網絡,獨立網絡可以獨立運行5G服務而唔需要牽涉到現有嘅4G核心網絡。相比之下,非獨立5G就係建基於現有嘅4G網絡上面。 獨立5G網絡喺低延時同高安全性嘅表現方面更加出色,並且可以喺智能城市、電子醫療、金融同現場廣播等領域當中使用。
韓國流動網絡提供商KT公佈咗去到2020年底為止,5G服務嘅用戶總數係362萬。 喺2020年最後一季,KT增加咗大約810,000個5G客戶,而2020年全年5G新增總數為220萬。 KT更加強調,去到2020年最後一個季尾,5G用戶已佔咗公司手機流動網絡總用戶嘅25%。 喺投資者網上會議當中,KT CFO 宣佈公司喺2020年完成咗喺全韓國85個地區嘅5G覆蓋。 2021年KT嘅目標基本上係向全韓國范圍擴展5G覆蓋。 佢哋更加希望可以喺今年內完成地鐵線覆蓋。 至於室內5G覆蓋,首先會將重點放喺一啲會有多人使用網絡嘅地方。 KT亦計劃推出一啲高速高用量嘅5G服務計劃,希望可以成功吸引4G LTE用戶轉用5G。 同時為咗照顧到一啲低用量4G 用戶,公司亦決定推出低用量嘅平價5G服務計劃。 佢哋相信隨住呢類低用量平價5G計劃嘅推出,將會進一步增加5G用戶人數。 就政府數據顯示,截至2020年,韓國全國擁有1185萬個5G用戶。 2020年12月,韓國全部網絡提供商加埋,總共增加咗大約90萬個5G用戶。 截至12月底,韓國目前嘅5G用戶佔全國7050萬流動網絡訂閱總數16.8%。
雖然印度仲未正式推出5G網絡,但係5G電話已經開始慢慢進佔市場。 根據諾基亞嘅一份報告顯示,印度全國有200萬部正在使用中嘅5G電話。即係話有好多人已經用緊5G電話,而當各大流動網絡提供商正式推出5G服務嘅時候,呢班人唔需要升級自己嘅設備就立即可以用到5G。 諾基亞表示,200萬部5G電話好平均咁分佈喺印度三大網絡提供商 Bharti Airtel,Reliance Jio 同 Vodafone Idea。 而當中 Airtel 已經喺海得拉巴成功測試咗自家嘅5G網絡。 當然,如果同印度現有嘅7億4G用戶相比,200萬唔係好多。但係隨住越來越多5G智能電話喺印度上市,普羅大眾喺選擇新電話嘅時候都會考慮支援5G嘅新型號。 相信當5G網絡正式推出嘅時候都會有唔錯嘅反應。 而 Airtel 更加係致力於開發自家製嘅5G網絡設備,並計劃喺今年下半年推出5G服務。 其實喺印度推出5G嘅唯一嘅阻力可能就係頻譜唔夠用,尤其係3.5 GHz頻段。 政府亦唔會喺嚟緊3月1號嘅拍賣度拍賣3.5...