星期六, 七月 24, 2021
一份研究報告顯示,澳洲5G智能電話出貨量市場佔有率已經由2020年第一季嘅14%增加到2021年第一季嘅55%以上。 2020年第四季蘋果 iPhone 12 系列同 2021年第一季三星 Galaxy S21 系列嘅推出推動咗5G智能電話嘅銷量。 隨住呢兩年5G智能電話嘅選擇越來越多,包括各種Android品牌一啲平價機款,願意購買5G電話嘅用家亦越來越多。澳洲發售嘅5G設備數量己經由2020年第一季嘅9款增加到2021年第一季嘅36款。 不過暫時澳洲5G流動網絡覆蓋範圍仍然慢慢擴充當中,即係代表就算擁有5G設備亦未必可以接收到5G網絡。 Optus、Telstra 同 Vodafone係澳洲三大5G流動網絡代理商。 澳洲喺4月完成咗26 GHz頻段頻譜拍賣,總共賣出數量358。 Telstra 購買數量最多(150),第二係 Optus(116)以及第三嘅 TPG Telecom...
中國其一間流動網絡提供商中國移動預計,2021年中國市場手機銷量將會超過3.5億部,其中5G手機超過2.8億部。中國移動2021年網內5G手機銷量超將會超過2億部。 而另一間網絡提供商中國電信亦公佈咗舊年2020嘅全年業績報告。2020年中國電信全年營運收入3935.6億,比2019年增增加咗4.5%。 2020年中國電信5G用戶人數達到8650萬,佔用戶總人數24.6%。而用戶總人數更加達到3.51億,增加咗1545萬,市場佔有率提升去到22.0%。 中國流動網絡用戶不斷增加,2月國內手機市場總體出貨量亦按年飆升2.41倍,達到2175.9萬部。 當中5G手機出貨量1507.1萬部,佔同期手機出貨量嘅69.3%。 今年頭兩個月,中國手機市場出貨總數量累計6187.9萬部,按年飆升1.28倍。5G手機出貨量4234.9萬部,佔咗總數嘅68.4%。 依照以上數據,5G手機已經超越咗4G成為手機嘅主流制式。
1月底中國發佈消息指出,中國喺2021年計劃新建5G基站60萬個。 隨住5G基站不斷增加,嚟緊兩至三年5G手機嘅換機潮相信會一浪比一浪強勁。 2020年中國5G電話銷量開始急速上升,各電話製造商都接到為數唔細嘅訂單。 不過由於疫情影響令到生產量未能追上。 廠商們唔單止訂單交貨期要大幅延長,製成品嘅存貨量都達到咗近幾年嚟最低嘅水平。 有數據顯示,2021年1月中國手機市場總出貨量有4012萬部,比舊年同期增加 92.8%。 5G手機方面,2021年1月中國市場出貨量有2727.8萬部,佔同期手機出貨量 68%。 舊年1月份5G手機佔嘅比例只係 26.3%。 隨住5G手機需求量激增,唔少型號都處於供不應求嘅狀態。 雖然購買5G手機嘅人數大增,但係預期當中嘅廉價千元價位5G手機仲未推出市場。 影響5G手機價格下調嘅原因,主要都係關乎屏幕成本同晶片成本。
根據最新數據顯示,iPhone 12 Pro Max,12 Pro 同 12 已經成為美國三款最好賣嘅5G手提電話。 iPhone 12 系列只係推出咗大概4個月就有呢個成績,証明咗 iPhone 喺美國仍然係主流。相信佢喺推動5G普及方面將會扮演一個重要角色。 報告係綜合咗銷量數據同埋由 Ookla Speedtest 用戶收集到嘅資料所得出。當中包含咗5G手機喺美國嘅累積銷量。 不過收集到嘅數據只係包括截至1月23號嗰個星期嘅銷售量。裏面係唔包括當時仲未開始出貨嘅三星 Galaxy S21 系列手機。 三星由2019年開始推出...
最新一份調查報告顯示,喺2020年一年嘅時間裏面,中國5G智能電話普及程度有所提高。 數據顯示,2021年1月份,中國市場5G電話出貨量有2727.8萬部,創下單一月份最高紀錄,佔咗同期手機出貨量嘅68.0%。 最新推出嘅5G新機款有23部,佔同期手機上市新型號數量嘅57.5%。相比2020年1月份,中國市場5G電話出貨量唔夠1000萬部,2020年全年嘅增長非常驚人。 手機市場總出貨量方面,2021年1月份中國手機總出貨量有4012萬部,比舊年同期增長咗92.8%,創下單月增長最高紀錄。 新推出嘅手機型號多達40款,比舊年同期增長咗17.6%。 當中智能電話出貨量佔手機總出貨量九成以上,新上市型號亦都係以智能電話為主。 2021年1月,中國市場智能電話出貨量有3975.2萬部,比舊年同期增加94.3%,佔同期手機出貨量嘅98.6%。 1月份,新推出嘅智能電話有29款,同比增長11.5%,佔同期手機新型號數量嘅72.5%。 同時中國手機市場國內外品牌比例方面,國產品牌手機佔主導地位。 2021年1月,國內手機市場中國品牌手機出貨量有3372.6萬部,較舊年同期增加咗84.1%;新上市機款有34部,較舊年同期增加咗3 %。 從以上數據所得,中國用戶喺購買5G電話嘅人數不斷上升。相信4G電話好快就會成為小眾,而當中國產牌子亦非常受歡迎。 睇嚟除咗 iPhone 之外都好難有其他外國牌子可以喺中國市場大賣。
聯發科最近擊敗高通,成為2020年第三季最大嘅晶片供應商。聯發科成功以31%市場佔有率擊敗咗高通嘅29%。 之前好多智能電話品牌都經歷咗銷量停滯或者下滑之後,今季智能電話銷量再一次有所增長。研究報告顯示,對於聯發科嚟講,印度同中國等關鍵地區嘅增長幫助咗公司喺數量上面超越高通。 聯發科嘅高銷量受惠於售價喺100美金到250美金之間嘅中低檔智能電話大賣。 不過報告亦指出,2020年第四季高通可能會重奪最大晶片供應商第一把交椅。 聯發科業務增長另一個原因係小米手機嘅銷量增加,而小米手機係印度最暢銷嘅手機。 同舊年同期相比,小米使用聯發科晶片嘅比率增長咗三倍以上。 5G晶片方面,高通仍然保持住領先地位。2020年第三季賣出嘅5G電話當中,有39% 5G晶片係由高通提供。 隨住好多國家都推出咗5G網絡,對5G智能電話嘅需求增長咗兩倍。 結果係喺2020年第三季售出所有嘅智能電話當中,有17%係5G機款。 隨住5G iPhone 12系列嘅推出,預計呢個數字喺2020年最後一季將會進一步上升。 而5G晶片價格亦越嚟越低,印度5G電話銷量喺2021年有望大幅增長,從而再進一步刺激中階5G智能電話嘅銷量。
根據一份最新調查數據顯示,iPhone 12 成為咗今年10月份全球銷量最高嘅5G手機。而且值得注意嘅係,10月份 iPhone 12 只係賣咗兩星期就得到呢個成績。 Apple 喺10月第二個星期公佈咗 iPhone 12 同 iPhone 12 Pro。之後喺10月23號,新機正式公開發售。 所以其實10月大概只係賣得一個星期左右。不過根據數據顯示,只係短短嗰一個星期嘅時間,iPhone 12 系列就迅速成為當月最好賣嘅5G手機。 喺市場佔有率方面,今年10月份,iPhone 12 以16%成為咗5G設備銷量榜嘅冠軍,排第二嘅係 iPhone 12 Pro,佔8%。排第三嘅5G手機就係競爭對手三星嘅 Galaxy Note 20 Ultra,10月份呢部三星嘅旗艦機市場佔有率只有4%。
有分析公司表示,全球智能電話市場經過今年受疫情嚴重影響之後開始慢慢恢復增長。 由其係聖誕節期間嘅強勁銷量以及大衆對5G網絡需求加強,令智能電話喺第三季嘅銷量多於預期。 分析公司認為,由於供應鏈快速恢復以及製造商、營運商同零售商都努力推廣新款5G設備,第四季全球出貨量將增加2.4%。 而預計到2024年,市場將逐年擴大,五年增長率為1.3%。 雖然之前擔心5G需求疲弱,但係5G智能電話銷量喺今年第三季超過預期,而且進入聖誕銷售旺季一直去到2021年仍然會繼續強勁。 雖然全世界好多地方持續受到封鎖同經濟問題困擾。但係消費者由於正常嘅消費例如:旅行、出街食飯同一般休閒活動都大量減少咗。大家都將消費轉移咗去電子產品上面,當中智能電話更加係其中一樣大大受益嘅產品。 當中 iPhone 12 亦都扮演咗好重要嘅角色。預計2020年5G出貨量將會佔全球出貨量十分之一,到2024年將會上升到29%。 隨住越嚟越多中低階5G電話喺市場推出,嚟緊5G電話將會更加普及。 喺疫情大流行之前智能電話一直面對市場飽和呢個問題。各個電話製造商都希望5G可以重振市場,雖然疫情好似將呢個希望打破咗。
Apple iPhone 12 似乎陸陸續續都遇到一啲唔同嘅軟件問題。 啱啱就有用戶投訴佢哋喺 iPhone 12 Message app 度收唔到群組短信。 呢個相信並唔關網絡營運商嘅事,因為呢個問題喺用唔同電訊公司嘅用戶身上都有發生。 受影響嘅用戶都話佢哋睇唔到群組短信嘅回覆。而好多時群組都係同工作有關,如果睇唔到群組短信或者回覆會對工作有好大影響。 由其依家有好多人都 work from home, 睇唔到工作群組嘅信息會嚴重影響工作效率。 而問題似乎唔止喺iOS同iOS用戶之間發生。iOS同Android用戶之間互傳嘅短信都受影響。 一位...
針對有媒體測試出 Apple iPhone12 喺使用5G網絡情況之下,電量消耗非常快呢個問題。 Apple 回應話 iPhone12 增加咗智能數據模式可以平衡數據同電量。 不過 Apple 話佢哋嚟緊都會通過軟件升級,加上同營運商合作去優化使用5G時候嘅耗電量問題。 經測試後,多款支持5G網絡嘅手提電話喺屏幕調到最光嘅狀態之下,iPhone 12 同 iPhone12 Pro 續航分別係8小時25分鐘同9小時6分鐘; 而三星S20 + 5G 同 Oneplus 8T 5G,續航時間分別係10小時31分鐘同10小時49分鐘。 而 Google Pixel 5 嘅續航時間就有9小時56分。 即係話,喺大家都係使用5G嘅情況之下,iPhone 嘅續航時間係短過哂以上幾款 Android 5G 機。